بكل إحساسها قالت: كارهَاك كارهَاك أنا مبقتش حاسة اتجاهك بأمان وأتمنى لو يرجع الزمان وممشيش من نفس الشارع اللي شُفتك فيه وأكسر خطي اللي كلمتك عليه وأمشي باصة في الأرض مش بصالك وأقول لقلبي لا لو حاول يختارك أتمنى يرجع الزمان علشان مكنتش اختارك.
كنت معاك وكنت بتمنى نكمل كنت معاك وانت عايزني كنت معاك وانت صايني كنت معاك وانت حاببني ودلوقتي سيباك وانت خايني سيباك وانت واجعني سيباك وانت محاولتش حتى تحاول متسبنيش كأنك مصدقت. تسبني كأنها فرصة ذهبية جتك كأنه كان طلب بالنسبالك وربنا استجاب لصلاتك.
كنت جايلي خايف طمنتك كنت جايلي مهدود سندتك كنت جايلي واقع قومتك ولما بقيت كويس قررت إنك تخون تقريبًا نسيت إزاي أنا علمتك تصون علمتك الحب ولما عرفته محبتنيش كنت معاك ولما وقفتك على رجلك وعرفتك الطريق ولما عرفته قررت تمشي لوحدك ومتخدنيش وأنا دلوقتي واقفة في الطريق وحدي واقفة بفكر في كل حاجة بنيتها على وجودك في كل اسم ولد وبنت لأولادنا وكل تصميم لشقتنا وكل الألوان اخترناها بصعوبة في كل هدية وكل مقابلة في كل مسكة إيد دلوقتي إيدي كأنها مكسورة كأنها بردانة ومصلوبة وأفكر وأقول لنفسي خليكي صابرة دا بيحبك وشاريكي وهي بس مسألة وقت وهيكون ليكي شجعي يا بنتي وحبي ودلعي خلي أحسن راجل في العالم ما هو هيكون راجلك وأب لأولادك.
وفي الآخر تسبني واقفة بصبر نفسي على فراقك ياخي حرام عليك طول الوقت كنت بكتبلك جوابات مكنتش أعرف إن هيجي اليوم وأكتبلك وأنا سيباك كنت بتمنى اليوم اللي بشوفك فيه وأجهز نفسي قبلها بساعات علشان أكون في عينك أجمل واحدة ودلوقتي بتمنى مشوفكش حتى لو صدفة بتمنى لأي واحدة متقابلش واحد زيك وبعد ما كنت بقولك ربنا يديك طولة العمر بقولك دلوقتي من كل قلبي يا رب ربنا ياخد كل واحد زيك والسنين هتعدي وزي ما سبت الأحباب الأحباب هيسيبوك وتتحول من شخص سايب إلى دايمًا شخص متساب كارهَاك كارهَاك
#كارهاك #ابراهيم_اسحق يارب تعجبكم ❤❤
لا توجد تعليقات معتمدة بعد.