تطوير النفس

تعالى أقولك…

تخيل معايا لو عندك غسالة أوتوماتيك فيها 3 مميزات: 1- بتغسل 2- بتعصر 3- بتنشف

بعد فترة… ميزة التنشيف باظت. هل ينفع لسه أقول عليها غسالة؟ أيوه، لأنها بتغسل وبتعصر.

بعد فترة تانية… ميزة العصر باظت. هل لسه ينفع أقول عليها غسالة؟ أيوه، لأنها لسه بتغسل.

لكن… لما ميزة الغسيل نفسها تباظ، هل لسه ينفع أقول عليها غسالة؟ طبعًا لا. لأنها دلوقتي منظر بس… شكلها غسالة، لكن مش بتعمل اللي الغسالة المفروض تعمله.

نفس الكلام بيحصل مع بعض الناس في حياتهم… يبدأوا حياتهم بحماس، عندهم أهداف، مهارات، وطاقة. مع الوقت… يفقدوا مهارة أو اتنين، ويكملوا. لكن الخطر لما يفقدوا كل حاجة… الحماس، الهدف، والرغبة في التطوير. ساعتها بيبقوا منظر بس… شكلهم عايشين، لكن جواهم مفيش حركة ولا تقدم.

📌 فمن فضلك… راجع نفسك اسأل نفسك: أنا فاقد إيه؟ وبكمل إزاي؟ وإيه اللي بيقودني دلوقتي؟ وعايز ايه؟ النجاح مش كلمة ولا صورة حلوة على السوشيال ميديا. النجاح شغل مستمر على النفس، وتعلم، وتطوير، وتجربة. وتعب وتعب وتعب وتعب وتعب...

لو فقدت جزء من طاقتك… عادي، اشتغل على نفسك وكمل. لكن لو فقدت كل حاجة جواك… لازم توقف، تعيد حساباتك، وتبدأ من جديد.

💡 تخيل معاك 100 جنيه ومش بتشتغل… بتصرف منها. لما يبقوا 80، عادي. يبقوا 50، لسه ماشي. لكن لما يوصلوا صفر… هنا لازم تتحرك وتشتغل علشان تعيش.

في حاجات لازمها وقفة حقيقية… وحاجات ينفع تتصلح وإنت ماشي. لكن في حاجات تانية… لازم ترجع لأول الطريق، لأن ممكن ببساطة الطريق نفسه ما يكونش طريقك الصح.

"اوقات الطريق نفسه بيكون غلط مش طريقتك هي الغلط"

#ابراهيم_اسحق