الثانوية العامة

سيبك من الرغي وتعالى أقولك شوية حاجات عن ثانوي عام لازم تبقى عارفهم...

هقولك من الآخر كدا... زمان كانت نتيجة الثانوية حاجة "مبهرة"، آه والله! اللي كان بيجيب مجموع عالي كان بيتشهر، حرفيًا. والناس كانت بتشوفه عبقري زمانه. ليه؟ علشان كانوا شايفين إن الدكتور والمهندس والمحامي والمدرس والظابط هما القمة، ولو عندك حد في العيلة دكتور أو مهندس الناس كانت بتتباهى بيه وتحس إنه حاجة من كوكب تاني.

بس دا كااان زمااان… وحط تحت "زمان" مليون خط.

تعالى بقى للنهاردة… الناس بطلت تنبهر بالدرجات والكليات. ليه؟ علشان الناس بقت ناضجة وواعية… بقت فاهمة إن النجاح مش بس بدرجة أو كلية أو لقب. الناس دلوقتي عايزة تشوف الشغل، الإنجاز، المهارة. يعني مش هتقولك "واو!" علشانك دكتور أو مهندس… لأ، هتسألك: "بتعرف تعمل إيه؟"

وخليني أقولك، كل سنة بيحصل نفس الحكاية… تسريبات، غش، امتحانات بتتسرب من قبل ما توصل للطلبة، واللي يقولك النظام مؤمن 100% يبقى مش عايش معانا!

كل ورقة امتحان مرت على: حد كتبها، وحد طبعها، وحد شالها، وحد حطها، وكل ده بيتم عن طريق جهاز كمبيوتر من البداية… يعني عادي جدًا تتسرب… وسهل جدًا يحصل غش.

والناس مش غريبة عن بعض، اللي طول السنة مطنش مش فجأة هيبقى أينشتاين، والمجموع العالي مش دايمًا معناه إن الشخص ده جامد، فيه ناس بتدخل كليات كبيرة وبتفشل فيها، وفيه ناس بتدخل كليات عادية وبتكسر الدنيا.

كل واحد وله حمولة مناسبة ليه، ما ينفعش أشيل طفل ٤٠ كيلو وزن ٢٠٠ كيلو! كلنا مختلفين، وكل حد ليه سكته.

الوعي الحقيقي هو إنك تبقى فاهم إن الثانوية بداية مش نهاية، لو جبت مجموع عالي… مبروك، بس الشغل لسه قدام. ولو مجموعك قليل… عادي جدًا، دي خطوة في طريق طويل.

وخلي بالك… لو لسه شايف إن في حاجة اسمها "كليات قمة" راجع نفسك… لإن الدكتور والمهندس مش بياخدوا فلوس عشان لقبهم، الفلوس بتيجي من المهارة، من التعب، من التطوير المستمر.

وأنا مهندس وبقولك الكلام ده… اللقب لوحده مش بيأكّل عيش! لو معندكش مهارات حقيقية… الذكاء الاصطناعي خد مكانك خلاص. "خد مش لسه هياخد"

الشغل دلوقتي محتاج: كورسات – مهارات – تجارب – مشاريع مش بس تقدير ولقب وجامعة لان كل دا بيكون سطر في السي ڤي بتاعك.

وصدقني، مفيش حاجة اسمها كليات قمة وقاع، فيه شخص فاهم هو رايح فين وبيشتغل على نفسه.

والمستقبل؟ المستقبل تكنولوجيا… مش علشان أنا دارسها، لأ، علشان دي الحقيقة. أي مجال بتشتغل فيه… لازم تتعلم تكنولوجيا برمجة – ذكاء اصطناعي – لغات – تصميم… حتى لو أنت دكتور، أو في كلية آداب أو حقوق أو أي مجال، اتعلم تكنولوجيا علشان تفضل في الصورة، علشان محدش يستبدلك.

لو لسه مش مقتنع إن التكنولوجيا هي المستقبل، فخليني أقولك شوية أمثلة هتخليك تراجع نفسك:

مارك زوكربيرج: ساب جامعة هارفارد، واحدة من أقوى جامعات العالم، وراح أسس فيسبوك… اللي حرفيًا غيّر شكل التواصل في الكوكب كله. بقى ملياردير من التكنولوجيا، مش من الشهادة.

ستيف جوبز (مؤسس Apple): سقط من الكلية، وكان بيحضر كورسات. بس حبه للتكنولوجيا والإبداع خلاه يبني واحدة من أكبر الشركات في العالم. حد سألوا خدت كام في الثانوية؟ محدش!

إيلون ماسك (مؤسس Tesla و SpaceX): الراجل ده بيقود تكنولوجيا المستقبل في العربيات والطيران والذكاء الاصطناعي. شغله ومهاراته هي اللي خلت الناس تمشي وراه، مش الكلية اللي اتخرج منها.

أشهر اليوتيوبرز والمبرمجين العرب: ناس كتير جدًا بتكسب دلوقتي آلاف الدولارات في الشهر، من البرمجة، التصميم، الذكاء الاصطناعي، المحتوى التقني. ومعظمهم مش خريجين كليات "قمة"، ولا جابوا ٩٩٪ في الثانوية.

ناس عاديين جدًا اتعلموا أونلاين: في شباب بدأوا من الصفر… اتعلموا برمجة أو تصميم أو تسويق رقمي من على يوتيوب أو كورسات مجانية، ودلوقتي بيشتغلوا مع شركات بره مصر وهما قاعدين في البيت. مفيش حد سألهم "انت خريج إيه؟"، سألوهم: "بتعرف تشتغل؟ بتعرف تحل مشاكل؟ بتعرف تطور؟"

الكلية مش ضمان لمستقبلك، لكن المهارة = أمان واستمرارية وفرص مفتوحة. لو حقيقي عايز تبقى "ناجح" مش "مزيف"، اشتغل على نفسك، اتعلم، طوّر مهاراتك، وخلي التكنولوجيا سلاحك في الحياة دي.

المستقبل مش للي معاه شهادة… المستقبل للي بيعرف يشتغل.

الثانوية العامة بداية، مش نهاية. واختياراتك مش نهاية العالم، بس شغلك على نفسك هو اللي هيحدد مكانك.

💡 ملحوظة مهمة لازم أوضحها في الآخر:

أنا مش بقول إن كل الناس بتغش، ولا إن كل الامتحانات بتتسرب، ولا إن كل اللي جاب مجموع عالي غشاش… خالص، أنا عمرى ما هعمم كدا. بس أنا بفكر معاك بصوت عالي… وبقولك إيه اللي بيحصل حوالينا في الحياة وفي سوق الشغل.

أنا بس بحاول أفتحلك عينك، وأقولك إن الفكر اتغير، وإن الناس بقت بتدور على المهارة والشطارة الحقيقة، مش بس ورقة مكتوب فيها مجموع أو لقب.

ولما بقولك إن "التكنولوجيا هي المستقبل"، مش قصدي إنك تدخل كليات تكنولوجيا بس! أنا قصدي إنك تتعلمها، تضيفها لمجالك، تكون فاهمها وعندك فكرة عنها، علشان تفضل دايمًا في الصورة، ومتتسابش على جنب لما الدنيا تتطور.

سواء كنت طبيب، مهندس، محامي، مدرس، أدبي أو علمي… التكنولوجيا بقت جزء من كل مجال، واللي مش هيواكبها… هيتساب ورا.

💬 ابراهيم اسحق

#الثانوية_العامة #نتيجة_الثانوية_العامة #الاوائل #الراغبات #الكليات #تكنولوجيا #تعليم_اونلاين #مهارات_النجاح #الذكاء_الاصطناعي